الله لوتدرين وش بي من اشـواق
تدفعني اللهفـه واسابـق حنينـي
يالين يصبح بيني وبينـي سبـاق
يرضيك لو ذا صار بيني وبينـي؟


كنتي غرام وساكنه جوف الاعماق
وباقي غرام وساكنه وسط عينـي
تشتاق والا أعلمك كيف تشتـاق؟
وتشوف كيف الشوق طعمه حزيني


القلب جاله من ورى العام سرّاق
والعيـن جاهـا مايبيـح كنينـي
أزريت أجاهد خافقٍ مابعـد فـاق
وأزريت أطنش واتغانـم سنينـي


البارحـه مابيـن راعـد وبـرّاق
واللـي خـلا تفكيرهـم نايمينـي
سريت فكري فوق ماهوب يطّـاق
وعضيت من ضيقي اصابع يميني


لارايـقٍ بالـي ولاخاطـري راق
ولاْ اللي تمنيته يجيني .. يجينـي
إن مت من همي أبَموت مشتـاق
يعني انـا ميـت كـلا حالتينـي


اذكر يديني ضمت إيديـك بإرفـاق
واطالع يدينـي .. وأقبـل يدينـي
ياليت جرح الشوق بالحق ينسـاق
وآخذ جروحي منـك وآرد دينـي


مير البلا طيفك اذا شفته انسـاق
غصب على قلبي يخـق ويلينـي
قولوا لها كان الرضا بس بعنـاق
بضمهـا وأقــول لاتتركيـنـي