تمهل قبل لاترحل وأخذ معك السهر ياصاح,,

ونوح ماطوى ياسي وقصيد مله الدفتر..

عساي اليا ابتعد زولك اطيب وخافقي يرتاح,,

واقول ان الزمن وفى ولو ان الزمن قصر..
تعبت اضحك على نفسي واقول الهم عني زاح,,

وتعبت ابحث عن الحلم الكبير اللي بك اتكسر..

وتعبت اداري احساسك وظلمك داخلي يجتاح,,

سلب ابسط طموحاتي واقول تهون واتصبر..

ولكن مانفع صبري وحظي لو تعثر طاح,,

وعرفت انك نهاية حب ودرب للشقا اغبر..

وعرفت انك اليا منك خطيت تطري المرواح,,

وخطاي اني لايامنك خطيت اجيك واتعذر..
افا والله حبيبي ماهقيتك تنكر اللي راح,,

ولاظنيت في لحظه يجي يوم وتتنكر..

حسبتك لالتطم موج الفراق وضيع الملاح,,

تكون بعينه المرسى ولكن كنت تتكبر..

وحسافه يالسنين قضيناها حزن وافراح,,

ابد مامرت ببالك ولاحبيت تتذكر..

واذا هذي نهايتنا ابشعل للجفا مصباح,,

واببقى الشامخ اللي مانكر ذاته ولاتغير..

ولكن قبل لاترحل اخذ كل السهر ياصاح,,

ونوح ماطوى ياسي وقصيد مله الدفتر..